(Hadalsame) 02 Dis 2023 – Midowga Yurub ayaa dib u iibiya in ka badan shan meelood oo meel gaaska dabiiciga ah (LNG) ee laga keeno Ruushka kaasoo ay u diraan qaybaha kale ee adduunka, sida uu sheegay Financial Times.
Keenista LNG-ga Ruushka ayaa laga mamnuucay UK iyo Netherlands, inkasta oo xogtu ay muujinayso in saadkan Ruushka laga keeno ee LNG “si joogto ah loogu kala wareejiyo” maraakiibta dalalka Belgium, Faransiiska, iyo Isbaanishka kahor inta aan loo dhoofin iibsadayaasha dalalka kale ee adduunka, ayaa tiri FT.
Sida laga soo xigtey FT, dekedaha ku yaal saddexda waddan ee EU-da ka wada tirsan ayaa waxay sii wadaan inay helaan xaddi badan oo gaaska Ruushka ah oo kaga yimaada wershadda cirifka qabow ku taalla ee Arctic Yamal LNG.
Xaruntan ayaa ah tan soo saarta gaaska labaad ee xaddi ahaan ugu badan Ruushka, waxaana saami ku leh Novatek, Shirkadda Shidaalka Qaranka Shiinaha, iyo Shirkadda Tamarta Faransiiska ee TotalEnergies.
Maqaalku wuxuu sheegay in dekedaha Zeebrugge ee Belgium iyo Montoir-de-Bretagne ee Faransiisku ay heleen shixnadaha ugu badan ee gaaska dareeraha ah ee LNG-ga Ruushka marka la isku daro dhammaan dekedaha EU sanadkan 2023.
“Daabulista waxaa badiyaa isu dhaafa maraakiibta ‘barafka ku socon kara’ ee Ruushka ee loo isticmaalo inta u dhaxaysa jasiiradda Yamal iyo woqooyi-galbeed ee Yurub iyo maraakiibta LNG ee caadiga ah oo markaa kaddib u dhoofiya dekedaha kale, si ay maraakiibta barafka loogu tala galay ay dib ugu noqdaan woqooyiga,” FT ayaa qoray.
Midowga Yurub wuxuu soo dhoofsaday 17.8 bilyan cubic mitir oo gaaska Ruushka ee LNG intii u dhaxaysey Janaayo iyo Sebtembar ee sanadkan oo qura, sida laga soo xigtay barta FT.
Waxay waxan oo dhami dhacayaan iyadoo ay EU-du sheegayso inay cunaqabatayn ku hayso shidaalka Ruushka gebi ahaanba.
Hadalsame Media
