(Hadalsame) 22 Agoosto 2023 – Markab wayn oo nooca xamuulka qaada ah oo lagu magacaabo Pyxis Ocean ayaa safarkiisii ugu horreeyey bishan shalay u baxay. Laakin si ka duwan maraakiibta kale ee ka horreeyey, kani waxa uu qayb ahaan ku shaqeeyaa tamarta dabaysha.
Markabkan oo u kiraysan shirkad laga leeyahay dalka Maraykanka oo lagu magacaabo Cargill, ayaa lagu xiray laba WindWings – oo ah biro waawayn oo dhererkoodu dhan yahay 37.5 mitir (123 cagood), waxaana naqshadaysay shirkadda UK ee BAR Technologies, waxaana soo saartay shirkadda Yara Marine Technologies oo ay u kaashato dhanka wershadaynta.
Baalashan dabaysha tamarta ka dhalinaya ayaa waxa la filayaa inay qiiqii shidaalka ka bixi lahaa meesha ka saaraan ilaa 30%. Haddii dabaysha lagu daro shidaallo kale oo aan saliid ahayn, waxay soo saarayaashu sheegeen in shidaalka caadiga ah ee laga maarmayaa uu kasii badan doono.
Socdaalka markabkan oo ka soo bilowday Shiinaha ayaa hadda kusii jeeda dalka Brazil, waxa uuna tijaabin doonaa farsamadan ugubka ku ah maraakiibta.
Waxaa sidoo kale lasoo wadaa maraakiib ku shaqeeya koronto iyo noocyada kale ee tamaraha la cusboonaysiin karo.
Hadalsame Media
