(Pennsylvania) 31 Luulyo 2023 – Madaxwaynihii hore ee Maraykanka ee Donald Trump ayaa ku beegay Joe Biden xilli uu olole doorasho ku qabtay Pennsylvania Sabtigii, isagoo ku tilmaamay ninka uga dambeeyey Aqalka Cad “Madaxwaynihii ugu musuqmaasuqa badnaa taariikhda Maraykanka.”
Trump ayaa u sheegay dad aad ugu daacad ah oo ku sugnaa Erie Insurance Arena. “Weligiis ma uusan ahayn nin meesha ugu sarreeysa ka jooga ciyaarta siyaasadda. Waxaan ka hadlaynaa eey cunuggii weliba doqon ah.”
Trump, oo ah musharraxa ugu cadcad hanashada magacaabista xisbiga Jamhuuriga si uu ula tartamo musharraxa Dimoqraadiga ah ee la filayo inuu noqdo Biden doorashada madaxtinimada ee sanadka soo socda, ayaa sidoo kale u adeegsaday madashan inuu ku dhaleeceeyo dhowr arrimood oo sharci ah oo uu qoorta kula jiro.
Kuwaas waxaa ka mid ah eedaymo heer federaal ah, oo loo muddeeyey bisha Maajo ee soo socota, halkaas oo uu kaga jawaabi doono eedaymaha la xiriira sheegashada ah in uu si sharci darro ah u haysto macluumaadka Dowladda Federaal oo uu la tegey gurigiisa Mar-a-Lago ee Florida.
Trump ayaa sidoo kale si wayn loo hadal hayaa in lagu soo oogi doono dacwad kale oo heer federaal ah, middaasoo la xiriirta doorkii lagu eedeeyey inuu ku lahaa rabshadihii ka dhacay Aqalka Baarlamanka Maraykanka ee Capitol Hill 6-dii Janaayo 2021-kii.
“Waxay sugayeen laba sano iyo bar, ama ku dhowaad saddex sano, si ay tan u keenaan bartamaha doorashadayda madaxtinnimo, sababtoo ah waa faragelin doorasho,” ayuu yiri Trump. Waxa uu intaa ku daray: “Aniga ima dacwayn; idinka ayay idin dacwaynayaan. Waxa dhacda inaan jidkooda taaganahay oo aan caqabad ku ahay.”
Hadalsame Media
