(Khartuum) 25 Abriil 2023 – Soomaaliya, Jabuuti, iyo Kenya ayaa bilaabay inay muwaadiniintooda ka soo daadgureeyaan dalka Suudaan, HALKAASOO ay socdaan dagaallo u dhaxeeya ciidamada Suudaan iyo kuwa gurmadka deg degga ah kaasoo qarxay 15-kii Abriil.
Kooxdii ugu horreeysay oo muwaadiniin Soomaaliyeed ah oo ay ku jiraan arday ayaa gaarey dalka Itoobiya, sida uu sheegay sarkaal ka tirsan Wasaaradda Arrimaha dibedda dalkaasi oo la hadlay warbaahinta gudaha ee magaalada Muqdisho Isniintii. Halkan kasii aqri…
Wuxuu sheegay in 27 qof oo Soomaali ah oo ay ku jiraan afar dumar ihi ay gaareen dalka Itoobiya kaddib markii ay Jimcihii kasoo gudbeen xuduudka Metema.
Dhanka kale, Hay’adda Maaraynta Musiibooyinka Qaranka Soomaaliyeed (SODMA) ayaa dadka Soomaaliyeed ee ku dhaqan dalka Suudaan u samaysay taleefoonno 24-saacadood ah, kuwaasi ay soo wici karaan dadka u baahan in la daadgureeyo.
“Haddii aad tahay muwaadin Soomaaliyeed oo ku sugan Suudaan ama aad halkaas ku leedahay qoys iyo saaxiibbo, deg deg ula xiriir SoDMA,” ayay hay’addu ku tiri bayaan ay soo saartay Isniintii.
Jabuuti ayaa sidoo kale bilowday inay shaqaalaheeda diblomaasiyadeed iyo muwaadiniinteeda ka daadgureyso Suudaan.
Dhanka kale, Kenya ayaa sidoo kale xaqiijisay inay Suudaan ka qaadday 29 ka mid ah ardaydeeda kuwaasoo ugu xayirnaa Suudaan sababo la xiriira dagaallo xooggan oo la isku adeegsaday hubka culus.
Hadalsame Media
