Soomaalidii beryahan Maraykanka u tahriibaysey oo durba dhac lagu bilaabay & 2 dhibaato oo kale oo la filayo

Safarkan oo ay ku baxayso lacag ka badan Labaatan kun oo dollar ($20,000), wuxuu bishii u dambeeyay u badnaa mid lagu guuldarraysanayo, waxaana la dhacay boqollaal kun oo doollar oo dadkan u badan dhallinyarada ay leeyihiin.

Socdaalkan wuxuu sidii kale soo bandhigayaa heerka doqonimadeenna, ma jirto meel ay ka dhacdo tobannaan qof oo wada socda hal qoomiyad kasoo jeeda haddana garoommada diyaaradaha tegaya iyagoon aan maskaxdooda ku jirin wax qorshe iyo ujeed ay ku socdaalayaan oo aan ka ahayn inay Maraykanka si tahriib ah ku galayaan, taa hadda waxay horseedday in la aqoonsaday, la ceebeysto – laguna bahdilo in sawirro laga qaado Baasaboorradooda.

Hadda labo arrinba waa la filan karaa; Baasaboorrada lagu safrayo oo Kenyan iyo Itoobiyaan ah in laga joojiya qaadashadiisa Bulshada Soomaalida, maaddama socdaalka sharci darrada ah uu qiimo dilo document-ga loo adeegsado, cid yeelaysana ma leh bulsho kale oo badana lacago kala baxa inay sumcad dilaan document qarankoodu leeyahay.

Midda labaad Maraykanka iyo waddamada kale ee ay dadkeennu iska dhiibaayaan in la tilmaamsado oo ay yaraadaan tirada sharciyada loo oggaalanayo ama waqti dheer oo qofka gaarsiisa heer maskaxiyan uu u xanuunsado inay sugidda sharciyada ku qaadato.

Heshiiskii dhowaan ee Marakanka iyo Canada isaguna wuxuu meesha ka saaraya in qofka iska dhiibay Maraykanka uu u tillaabi karo dalka Canada, sidii horay u dhici jirtey.