(Muqdisho) 23 Maarso 2023 – Dowladda Federaalka Somaliya ayaa Talyaaniga kala wareegtey gaadiid dagaal oo gaashaaman, kuwaasoo ay siisay Dowladda Talyaanigu.
Kulan kooban oo ku qabsoomay Safaaradda Talyaaniga ee magaalada Muqdisho ayaa waxaa gaadiidkan lagula wareejiyey Wasiiru-dowlaha Amniga iyo Taliyaha Booliska Soomaaliyeed.
Gaadiidkan ayaa la sheegay in loogu tala galay Ciidamada Booliiska gaar ahaan qaybta Daraawiishta, waana sababta uu ula soo wareegey Taliyaha Booliiska Soomaaliyeed, Jeneraal Sulub Axmed Firin.
Hadal kooban oo uu Firin ka jeediyey munaasabaddii ay DF gadiidka kula wareegtey ayaa sheegay in gaadiidkani ay wax badan ka tari doonaan dagaalka socda ee ka dhanka ah kooxda Al-Shabaabka.
Wasiiru-dowlaha Wasaaradda Amniga Maxamed Cali Xaggaa ayaa isna Talyaaniga uga mahad-celiyey wax uu ku sheegay taageero hagar la’aan ah la garab taagan yihiin ciidanka Booliiska.
Danjiraha Talyaaniga ee Somalia, Roberto Vecchi, ayaa isna goobta ka sheegay in Talyaanigu uu taageerayo codsi ka yimid Madaxwaynaha Soomaaliya ee Xasan Sheekh Maxamuud, kaasoo madaxda Talyaaniga waydiistey inay gacan uga gaystaan howlgallada ka dhanka ah kooxaha argagixisada, sida uu sheegay.
Hadalsame Media
