Ruushka oo lacag badan dul-dhigay madaxa askar reer Ukraine oo gubey Qur’aanka Kariimka (Waa imisa?)

0

(Moscow) 18 Maarso 2023 – Madaxa Jamhuuriyadda Chechnya ee Ruushka, Ramzan Kadyrov, ayaa abaalmarin qaali ah u ballanqaaday “ciribtirka” askar la sheegay inay Ukraine yihiin oo muuqaal laga soo duubay iyaga oo Qur’aanka karaamo darraynaya.

Muuqaalkan oo uu sarkaalkan Ruushku dib faafiyey ayaa muujinaya laba nin oo xiran wax u eg dareeska ciidamada Ukraine oo xaabo ahaan u isticmaalaya bogag kitaabka barakaysan ee QUR’AANKA ah si ay dab u shitaan.

Mar uu dhigay Telegram Jimcihii, Kadyrov wuxuu ku adkaystay in kaliya soo saarista “cambaarayn rasmi ihi aysan ku filnayn ficilka liita ee ay sameeyeen raggan gubay bogagga Qur’anka Kariimka ah.”

“Waxaan ku dhawaaqayaa abaalmarin dhan shan milyan oo ruble [$64,950 oo Doollar] si loo cidhibtiro wasakhdan,” ayuu qoray, isagoo intaas ku daray in abaalmarintu ay laba laab ka badnaan doonto haddii qofka kitaabka ku ciyaaray nolosha lagu soo qabto.

Waxa uu carrabka ku adkeeyey in abaalmarinta la qaadan karo waqti kasta mustaqbalka. “Mar kasta oo ay dhacdo – maanta, berrito, hal sano kaddib – lacagta waa lagu siin doonaa. Cid kasta ha yeelatee: koox, qof keligiis ah, qof deris ah, lacagtaas oo dhan ayaa lagu wareejinayaa.” ayuu ballanqaaday.

Hadalsame Media