(Hadalsame) 19 Agoosto 2022 – Afgaanistaan ayaa waxa ay doonaysaa in ay soo dhoofsato saliid iyo badeecooyin Ruushan ah oo ay ku beddelato macdanteeda, iyo sidoo kale sabiib iyo geedo dawo-dhireed ah, sida uu sheegay Wasiirka Wershadaha iyo Ganacsiga, Nuriddin Azizi, oo la hadlay RIA Novosti Jimcahan.
“Waxaan ku siin karnaa qaar ka mid ah macdanteena oo aan kaaga beddelayno badeecooyinka laga keeno Ruushka, oo ay ku jiraan alaabooyinka iyo ilaha tamarta,” ayuu yiri Nuriddin, isagoo yiri “Intaa waxaa dheer, waxaan haysannaa, tusaale ahaan, miraha la qallajiyey, sabiib iyo geedo dawo ah.”
Wasiirka ayaa tilmaamay in Afgaanistaan ay taariikh ahaan Ruushka siisay tiro badan oo ah saanado sabiib ah. “Waxaan keeni karnaa boqollaal tan oo badeecado ah.
Tusaale ahaan, qiimaha geedaha dawo-dhireedka ah ayaa hadda aad u sarreeya, Ruushkuna wuxuu u baahan yahay alaabta ceeriin ee laga sameeyo daawada. Waxaan tan u adeegsan karnaa bilowga ganacsiga wax kala iibsiga. Waxaan wershadaha Ruushka siin karnaa alaabta ceeriin, sida aan horeyba ula samaynay Shiinaha, “ayuu Wasiirku sharaxay.
Horraantii toddobaadkan, Nuriddin wuxuu sheegay in Kabul ay rabto inay iibsato hal milyan oo foosto oo saliid cayriin ah oo Ruushku soo saaray ama xitaa ka badan, isagoo xusay in dowladdu “ay jeclaan lahayd inay tixgeliso ikhtiyaarka ganacsiga iyo wax kala iibsiga.”
Yabooha Afgaanistaan waxay u badan tahay inay sabab u tahay lacagta adag ee dalka oo yaraatay. Kaddib markii Daalibaan ay la wareegeen dalkaasi bishii Agoosto 2021, Maraykanka ayaana wuxuu xannibay $ 7 bilyan kaydka lacagaha qalaad oo uu leeyahay Bangiga Dhexe ee Afgaanistaan taasoo lagu kaydiyey Bangiga Kaydka Federaalka ee New York.
$2 bilyan oo Doollar oo kale ayaa waxaa xayiray dalalka UK, Jarmanka, Imaaraadka iyo qaar ka mid ah dalal kale.
Bishii Maajo, Wakiilka Afgaanistaan oo u shaqaynaya sidii Ku Sime Danjire oo Daalibaan u fadhiya Ruushka, Jamaal Naasir Garwal, ayaa ka hadlay qorshaha ay Moscow kala xaajoonayaan oo ah inay helaan sahay shidaal oo ay Ruushka ka siistaan khayraadka dalkooda sida macdanta.
Hadalsame Media
