(Muqdisho) 31 Jan 2022 – Waxaa magaalada Muqdisho ka furmay tababar socon doona muddo todobaad ah oo la siinayo saraakiisha sarsare iyo kuwa dhexe ee Ciidanka Booliska Soomaaliyeed.
Ujeeddadu waa in laga caawiyo ka qaybgalayaasha inay horumariyaan xirfadaha maaraynta dhammaan hantida Ciidanka Booliiska Soomaaliyeed ee SPF.
Tababarkan oo uu Sabtidii furay Howlgalka Midowga Afrika ee Soomaaliya (AMISOM) ayaa waxaa maalgelinaya Barnaamijka Wadajirka ah ee Booliska (JPP), waxaana ka qayb galay 18 sarkaal oo ka tirsan Ciidanka Booliska Soomaaliyeed oo ka kala socday Waaxyaha Saadka, Isgaarsiinta, iyo Gaadiidka; iyo kuwo kale oo ka socda Agaasinka Tababarka iyo Qorshaynta SPF.
Daah furka tababarka ayaa waxaa si wada jir ah u gudoominayay Taliyaha Booliska AMISOM, Kaaliyaha Kormeeraha Guud ee Booliska (AIGP) Augustine Magnus Kailie, iyo Madaxa Xiriirinta Ciidanka Booliska Soomaaliyeed ee SPF, Sareeye Guuto (Brig. Gen.) Maxamed Cabdul Dhoorre, oo wakiil ka ahaa Taliyaha Ciidanka Booliska Soomaaliyeed.
AIGP Kailie waxa uu sheegay in tababarka, oo la jaanqaadaya waajibaadka tayeynta Booliska ee loo igmaday AMISOM, uu kor u qaadi doono xisaabtanka maaraynta hantida SPF ugu dambayna uu horseedi doono hufnaan iyo wax ku oolnimo agaasinka booliiska ah.
Deeq-bixiyeyaasha JPP-da ee xafladda lagu soo bandhigayay waxaa ka mid ahaa Midowga Yurub, Boqortooyada Ingiriiska AID, UNDP, UNOPS, iyo GTZ (Iskaashiga Jarmalka).
Hadafka guud ee JPP ee Soomaaliya waa in ay bixiso taageero hay’addeed si loo horumariyo Nabadda, Amniga, Cadaaladda, Sarreynta Sharciga iyo Badbaadada Soomaalida, sida la yiri.
Hadalsame Media
