(Hadalsame) 30 Jan 2022 – Taliyaha Ciidanka Cirka Somalia, Jen. Sh Ali Mohamed Mohamud, oo markii ugu dambaysey ee uu dayuurad dagaal kexeeyo ay ahayd bishii Maarso 1978-kii, ayaa rajo ka muujiyey dib u dhiska ciidankan oo ka mid ah 3-da garab ee CXD.
Jeneraalka ayaa sheegay in Ciidanka Cirka Maraykanka ee USAF ay haatan iskaashi kala leeyihiin dhanka sahanka iyo sirdoonka cirka (ISR) kuwaasoo saldhig ku leh Garoonka Ballidoogle.
Wuxuu sheegay in howlaha ISR aysan joogsan xitaa markii uu MW hore ee Donald J. Trump uu si halhaleel ah ciidanka Maraykanka uga saaray Somalia bishii Jannaayo 2021, iyadoo ay Ciidamadani ay Ballidoogle u adeegsadaan tababarka Danab iyo howlgallada gaarka ah.
Taliska Maraykanka ee Afrika (AFRICOM) ayaa ka gaabsaday inay ka hadlaan howlahan sirdoon iyo inay mustaqbalka dhow iskaashi la sameeynayaan Ciidanka Cirka Somalia, balse waxay hoosta ka xarriiqeen inay ka go’an tahay ka shaqaynta ammaanka gobolka, sida uu sheegay Afhayeenka AFRICOM, Timothy S. Pietrack oo la hadlay majaladda Air Force Magazine.
“Maraykanku ma joojinin howlihii sirdoonka, balse waxay dhimeen howlwadeenkoodii, waxay sidoo kale joojiyeen tababarkii ciidamada, balse had iyo goor duullimaadyada way wadeen,” ayuu yiri Jen. Maxamuud oo xusay inay bilaabayaan iskaashi nooc cusub ah oo dhanka cirka ah.
Waloow ay Maraykanku gaabsadeen misna wuxuu jananku sheegay in marka hore laga bilaabayo tababarka duuliyeyaasha Somalia, farsamayaqaannada, dadka hawada la socda iyo hagayaasha, iyadoo howsha laga bilaabayo dayuuradaha xamuulka ah ee ciidamada.
“Waxaan u baahan nahay ciidamo cir si aanu u taageerno ciidanka dhulka, dowladda iyo dadwaynaha marka ay abaari dhacdo iyo in lagu ilaaliyo hawada iyo badda Somalia.” ayuu yiri Jananka oo sidoo kale sheegay in sidaa uun looga takhalusi karo Al Shabaab.
Hadalsame Media
