(Nairobi) 29 Jan 2022 – Safaaradda Faransiiska ee Kenya ayaa ku boorisay dadka inay muujiyaan “feejignaan aad u wayn” maalmaha soo socda, iyadoo sheegtay inay jirto khatar weerar argagixiso oo soo fool leh oo ka dhan ah reer Galbeedka.
“Waxaa jirta khatar dhab ah oo ah in la beegsado goobaha caamka ah ee ay ku badan yihiin dadka ajnabiga ah (makhaayadaha, hoteellada, meelaha lagu nasto, goobaha laga dukaameysto), gaar ahaan Nairobi,” ayay safaaradda Faransiiska ku tiri hadal ay soo saartay.
Faahfaahino kale oo ku saabsan halista iyo halka ay ka timid xogta sirdoonku lama shaacin.
“Dadka ku nool Kenya waxaa lagula talinayaa inay muujiyaan feejignaan dheeri ah oo ay ka fogaadaan inay ku badan yihiin goobahaas dadweynaha maalmaha soo socda, oo uu ku jiro dhammaadka usbuuca (Sabti & Axad),” ayaa lagu daray qoraalka.
Maarten Brouwer, Safiirka Netherland u fadhiya Kenya, ayaa sheegay in saaxiibadiisa Safaaradda Faransiisku ay ku wargeliyeen halistan. “Macluumaadka waxaa loo arkayaa mid la aamini karo,” ayuu yiri.
Kenya ayaa dhowrkii sano ee la soo dhaafay waxaa ka dhacayay weerarro kala duwan, kuwaasi oo intooda badan ay fuliyeen Ururka Al-Shabaab ee xiriirka la leh Al-Qaacidda, kuwaasi oo fadhigoodu yahay dalka deriska la ah ee Soomaaliya, ayaa lagu qoray Bnonews.
Hadalsame Media
