(Washington DC) 13 Dis 2021 – Siyaasiga Maraykanka ah ee Rand Paul oo ka tirsan Xisbiga Jamhuuriga ayaa weerar ku qaaday Somalia iyo Ilhaan Cumar oo ay ka wada tirsan yihiin Koongarayska Maraykanka, waloow aysan isku aqal ku jirin.
”Waxaan joogaa magaalo ay ku nool yihiin qaxooti badan oo ka yimid Somalia, Bosnia iyo meelo kale mana arag iyagoo sheegaya in Maraykanku uu meel xun yahay, balse waxaan arkayey inay abaal ka hayaan. Qaarkood ayaa kasoo baxay daaha birta ah ee Shuuciyadda waana qiimeeyaan sida uu dalkeennu u wayn yahay,” ayuu ku bilaabay Paul.
Wuxuu deeto ku nuuxnuuxsaday xaaladda Ilhaan oo uu sheegay inay Maraykanka ka heshay wax kasta min waxbarasho, caafimaad, cadaalad, ilaa kaalmo bulsho iyo inay Koongarayska gasho, balse ay misna meel xun ku tilmaanto.
”Ma lihi aannu khasab dib ugu celinno, balse waxaan u jari lahaa rikit si ay u booqato Somalia, si ay wax uga barato musiibada ka taagan Somalia oo aanu ka jirin nidaamka hanti-goosigu, aan lahayn xuquuq dastuuri ah, isla markaana ay ka jiraan ilaa 7 qabiil oo dagaal iskaga horjeeda muddo 40 sanadood ah.” ayuu raaciyey.
Siyaasiyiinta Jamhuuriga ah iyo kooxaha midigta u janjeera ayaa inta badan weerar siyaasadeed ku qaada Ilhaan Cumar.
WATCH: Sen. Rand Paul says he’s willing to buy Rep. Ilhan Omar a plane ticket to Somalia, so she can learn first-hand how lucky she is to be an American.
— Election Wizard (@ElectionWiz) December 12, 2021
Hadalsame Media
