(Hadalsame) 11 Dis 2021 – Maraykanka ayaa ogolaaday xirmo ballaaran oo uu Giriigga ku siinayo 4 markab oo ah nooca Frigate-ka, isla markaana uu ku casriyaynayo kuwii uu horay u haystey, qorshe uu ku kacayo $9.4 bilyan oo doollar, tiiyoo ay jiro inuu jiro heshiis hordhac ah oo kan la mid ah oo ay Giriiggu la galeen Faransiiska.
Wasaarad Dibadeedka Maraykanka ayaa shalay arrintan ku dhawaaqday iyadoo lacagta la sheegay ay ku jirto $2.5 bilyan oo lagu casriyaynayo maraakiibta Gigiigga.
Maraakiibta la casriyaynayo ayaa lagu xirayaa agabyo kala nooc ah oo cusub sida madfac 5 inji ah iyo soonarka wax lagu dhegeysto, waxaana qandaraaska la siiyey shirkado Maraykan u badan sida Lockheed Martin, Raytheon, VSE Corporation iyo tan UK ee BAE Systems.
Si kastaba, France ayaa bishii Sebtembar ku dhawaaqay inuu heshiis noocan oo kale ah kase rakhiisan la galay Giriigga oo uu siin lahaa 4 frigate isla markaana uu u casriyayn lahaa dhowr markab kaasoo ku kacayey $3.4 bilyan (€3 bilyan). Afhayeenka Millateriga Faransiiska ee Herve Grandjean ayaana xilligaa sheegay in heshiiska la saxiixi doono muddo 3 bilood gudohood, kaasoo ku beegnaan lahaa bartamaha bishan.
Arrintan ayaa dhanka kale noqonaysa in markale uu Maraykanku dhabarka ka toogtey danta Faransiiska oo ay meel xun ka gaartey horraantii sanadkan kaddib markii uu kala wareegey heshiis ay kula jireen Australia isagoo Canberra u ballanqaaday gujisyo ku shaqeeya nukliyeerka, halka ay Faransiiska ka siin lahaayeen kuwo nafto ah.
Faransiiska ayaa markii ugu horreeysey taariikhda xitaa u yeertey danjiraha ka fadiya Washington DC, halka MW Emmanuel Macron uu si qoto dheer si muuqata ugu dhaleeceeyey Maraykanka iyo UK oo ay xulufo yihiin.
Hadalsame Media
