(Muqdisho) 22 Maarso 2021 – Madaxtooyada ayaa soo saartay war ay ku micnaynayso ama cinwaan ugu samaynayso kulanka ka dhacay Afisyooni ee ay yeesheen madaxda XF iyo qaar ka mid ah madaxda Maamul-goboleedyada.
”Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo ayaa guddoomiyey kulan hordhac u ah Shirka Qaran ee dhammeystirka Arrimaha Doorashooyinka iyo fulinta heshiiskii 17-ka Sabteembar 2020 ee ay ansixiyeen Baarlamaanka Federaalka Soomaaliya,” ayaa lagu yiri War Saxaafadeed kasoo baxay Madaxtooyada.
”Kulankan waxaa ka qeyb galay Ra’iisul Wasaaraha Xukuumadda Federaalka Soomaaliya Mudane Maxamed Xuseen Rooble, Madaxweyneyaasha Dowlad Goboleedyada, Galmudug Mudane Axmed Cabdi Kaariye, Koonfur-galbeed Mudane Cabdicasiis Xasan Maxamed, Hirshabeelle Mudane Cali Cabdullaahi Xuseen iyo Guddoomiyaha Gobolka Banaadir Mudane Cumar Maxamuud Maxamed.” ayaa la raaciyey.
Kulankan ayaa lagu fasiray mid hordhac ah, taasoo ka dhigan in aanu weli si rasmi ah u furmin shirku, kaasoo ay weli ka maqan yihiin labada Madaxwayne ee Puntland iyo Jubaland oo shuruudo iska soo daba saaraya.
Hadalsame Media
