(Hadalsame) 27 Agoosto 2020 – Waxaa maalin dhowayd xilka Agaasimaha Guud ee Madaxtooyada Qaranka iska casiley Agaasime Dr. Nuur Diiriye Xersi “Fuursade”.
MW Farmaajo wuxuu sidaa ku magacaabay shan (5) Agaasime Guud ugu Madaxtooyada Soomaaliya, haddana waxaa la sugayaa Agaasimihii lixaad (6) in uu dhawaan xerada soo galo.
Febraayo 16, 2017 ayaa Madaxweyne Farmaajo, Agaasimaha Guud ee Madaxtooyada, u magacaabay Cali Saciid Fiqi, oo horrey usoo noqday Danjiraha Soomaaliya ee dalalka Belgium, Netherlands, Luxembourg iyo Midowga Yurub.
Shan iyo toban (15) cisho oo keliya ayuu xilka hayey.
Maarso 2, 2017 ayaa Madaxweyne Farmaajo, ku badelay Abuukar Cabdi Cusmaan (Baalle) oo asna horrey usoo noqday Agaasimaha Xafiiska Ra’iisul Wasaaraha Soomaaliya iyo Xoghayaha Joogtada ee Wasaarada Arrimaha Gudaha.
Abuukar Baalle, kuma uusan waarin Xafiiska, oo saddex (3) bil ka yar ayuu xilka ku banneeyey. Cabdirazak Shoole, oo ku xigeen u ahaa, ayuu eersaday. Shoole, laftiisu, ugama dambeyn Villa Soomaaliya, oo Danjiraha Suudaan, ayaa loo magacaabay, kaddibna daaqadda ayaa lagala baxay Shoole.
Maajo 31, 2017 ayaa Fahad Yaasin Xaaji Daahir, Agaasimaha Guud ee Madaxtooyada loo magacaabay oo Madaxweyne Farmaajo, wax badan u ah.
Agoosto 22, 2018 ayuu Madaxweyne Farmaajo, ku badelay Aamina Saciid Cali, Fahad Yaasiin, oo loo badelay Hey’adda Sirdoonka iyo Nabad Sugidda Qaranka.
Aamina, muddo ka roon Fiqi iyo Abuukar Baalle, ayey Xafiiska Madaxtooyada maareysay. Hayeeshee, ayana waa la badelay.
Maajo 15, 2019-kii ayuu markale Madaxweyne Farmaajo, oo Rabbi, sida wax loo badelo barey, keenay Nuur Diiriye Xirsi (Fuursade) oo ay xidid dhow yihiin.
Agoosto 14, 2020 ayaa Nuur Fuursade, banneeyey Agaasimaha Madaxtooyada. Madaxweyne Farmaajo, hadda cidduu ku badeli lahaa Fuursade, ayuu baadi–good ugu maqan yahay.
Is badelka joogtada ah ee Agaasimayaasha Guud ee Madaxtooyada, waxaa lamid ah taliyaasha Bileyska, Nabad Sugidda, Militariga iyo Asluubta oo min lix (6) taliye iyo ka badan yeeshay!
Waxaa Diyaariyey: Mahad Geelle
Hadalsame Media
