(Delhi) 28 Dis 2018 – Dalalka China iyo India ayaa xiriir aad u xun oo aan wanaagsanayn lahaa muddo sanado ah welina xal kama dambayn ah arrinkooda looma hayo, yeelkeede, waxay sanadkan ku dhamaysanayaan iyagoo muujinaya in la iskaashan karo iyadoo uu xafiiltan jiro.
Si wada jir ah, ayay China iyo India waxay kaligood ka kooban yihiin 3 bilyan oo qofood, taasoo ah ku dhowaad 40% tirada dadka dunida, sidaa darteed waa laba dal oo muhim ah.
Labadan dal oo sidoo kale ciyaartooy muhim ah ka ah siyaasadda dunida ayay il gaar ah ku eegaysaa warbaahinta reer Galbeedka oo aan jeclayn inay ay is fahmaan labadan dal oo sanadkii tegey mar iskula dhici gaarey xudduudda Hindiya iyo Tibet halkaasoo ay dhagax, dhakaaryo iyo feer iskala daaleen. Halkan hoose ka DAAWO..
Hindiya ayaa Shiinaha ku qoonsatay waxyaabo ay ka mid yihiin Mashruuca Jidka Xariirta ah ee Shiinaha iyo Pakistan oo ay ku baxeeyso 60 bilyan oo doollar, kaasoo isku xiraya xeebaha Pakistan iyo Shiinaha.
Waxaa kale oo xiisadoodu laxaadsatey markii ay Shiinuhu saldhigooda qura ee caalami ah ay ka samaysteen dalka Djibouti taasoo keenta inay Badwaynta Hindiya isku arkaan maraakiibta Chinese-ka ee sahayda usoo sida saldhiggaasi iyo maraakiibta dagaal ee Hindiya.
Si kastaba, Hindiya oo dareensan inaan la isku halleeyn karin dalalka Galbeedka ayaa iminka xiriir wanaagsan la samaysatay dalal ay ka mid yihiin Ruushka iyo Iiraan, waxayna haatan u siqaysaa dhanka Shiinaha, halka Shiinaha laftiisa oo ay beryihiin dambe isku kacsan yihiin Maraykanku uu doonayo inuu meceeyo xiriirka uu la leeyahay Hindiya.
Hadalsame Media
